Posts
Mwose peeple believe seh Jamaican Creole ar patwa a nuh one real langwage becaw to nuff peeple it soun like "bastardized english" secanly, it nuh have a consistent an official writing system dat dem set in stwone, but mi deh yah fi tell yuh seh, chru research an study, di Jamaican Creole did deem by nuff Jamaican scholas fi be one langwage. Di scholas dem seh is a language becaw it have it own grammatical strutcha and if we did able fi decide pan a consistent spelling system, we cudda transcribe it. Fun and joke aside, we even ave extra featas like proverbial sayings an even shawt han weh we cyan apply to texts ar di hash-tag dem ar social website status pwose, if yuh get mi driff. Pan tap a dat, we av a couple word weh almwose indigenous to di creole langwage.
Anyway, jus fi introduce yuh to di likkle gramma weh mi learn bout mi vernacula lanwage in a college, mi a go give unuh some a di example dem.
Alrite, firs aff, fi some strange reason, Jamaicans nuh pronounce di en a some a di word dem. Simila to French weh di ending letta dem eda nuh get pronounce ar dem silent. Derefore, we seh tings like
An=and
Fren=friend
Gramma=grammar
Mwose=most
Wha=what
Alrite, dat is enuf pon dat, yuh get mi driff. Nex, mi a go lis di word dem weh specific to we langwage. Mek mi tek dis time fi infarm unuh seh some a di word dem cudda travel fram West Africa when di slave dem did ship ova to dis side a di worl. Okay, nat fi digress.
Pickney=children
Nyam=eat
Nuff= plenty
Mumma=mother
Madda=mother
Fawda=father
Puppa=father
Galang= go away
Mawga=skinny
Duppy=ghost
Mucky-mucky=nasty
Swawty= unattractively overweight
Wagga wagga=overweight
Sketel= classless female or vulgar female
nuh=not or do not (mi nuh nwoh=i do not know)
deh= there (ova deh so=over there)
unu=you guys, you people, It is a collective word for a group of individuals (unu too wicked=you guys are too wicked)
Di next reason dem deem Jamaican Creole fi be one langwage is di uniqueness a di gramma
Insted a adding "s" fi pluralize we nouns we just add di word "dem"
Di two brodda dem fava dankey.
We nuh add "ed" fi indicate pawse tense, insted we use di word "did" fi indicate pawse actian
Shi did nyam piece a di cyake caw shi did ungry.
Fi futa tense, we use di phrase "a go" ar "gwen"
Mi husban a go travel a foreign nex year.
or
Mi gwen go to di shop later
Okay, next lesson. We ave di article dem. A couple a dem is
Di= The
Dese=these
Dat=that
Dwose=those
Dis=This
An dis a go soun a likkle mix-up, but "dem" in a di Jamaican creole can use as a article to, plus as a pronoun.
A dem tings deh mi nuh like y'nuh. Weh we use "dem" like "those"
Dem peeple deh nuh like dem. Inna dis scenario, mi use "dem" like one article and like one pronoun. "Those people there, do not like them."
Anada ting, we pronounce an spell some a di word dem different from di english counterpart. Fa example:
Likkle=little
Miggle=middle
Tings=things
Saggle=saddle
Maggle=model
Tanks=thanks
teef=thief
Anada ting, mi waan fi trow in some a di shawt han to
dwl=dead wid laff
kmt=kiss mi teet
kmn=kiss mi neck
twy=tek way yuhself
boabdl=buss out a big dutty laff
Las, mi waan trow in a couple a di proverb and di sayings dem
Chicken merry awk deh near
Ottah den ten fyah side
Bad mine wos dan obeah
Dawg nyam yuh suppa
Empty bag cyaa stan up
Every mickle mek a muckle
bun a fyah
syake a unu
if yuh caan ketch quaco ketch im shut
So, dere is nuff mwore lessens fi learn but mi cyaan incorporate dem in a one blag, but as a Jamaican mi did affi blag bout we langwage, an as a previous langwage an communication myaja, mi did affi advocate di creole as a langwage cuz even some a we own peeple look down pon di vernacula an nuh even acknowledge it as a real lanwage but is alrite. Fi dwose dat understan, tank yuh fa reading, fa dwose dat nuh understan, tank yuh fa reading anyway an pleese feel free fi read di res a mi blag. :)http://www.jamaicans.com/speakja/patoisarticle/jcan_short.shtml
http://www.golocaljamaica.com/readarticle.php?ArticleID=4788
No comments:
Post a Comment